ASOCIACION DE MADRES Y PADRES

DEL

IES PEREZ DE AYALA

 

Actividades 2006-2007

DISCURSO

CEREMONIA DE GRADUACION 06-07

A contunuación transcribimos el discurso ofrecido por Mª Montserrat García Fueyo, profesora de LLingua Asturiana del I.E.S. Pérez de Ayala, con motivo de la Ceremonia de Graduación celebrada en este Centro el día 25 de Mayo de 2007.

 

 

 

         Buenes tardes a tolos alumnos, padres y familiares, profesores y personal del Centru.

 

         Quiero dar les gracies, enantes d’entamar, a l'Asociación de Madres y Padres por dame la oportunidá de tar güei equí con vosotros.

         Norabona  a los Bachilleres, a los Téunicos de Grau Mediu y Téunicos de Grau Superior y a los que nun se puen graduar tovía: ánimu, con un poco d’esfuerciu vais ser quien a consiguilo.

         La verdá ye que quiciabes nun seya la persona de más valir pa davos conseyos, sólo soi la interina d’asturianu, pero esto dame la posibilidá de falavos de lo privilexaos que sois por estudiar nesti Institutu Públicu. Un Centru abiertu por igual a toos, con profesores enforma profesionales y capacitaos. Trabayadores incansables y con una fuerte vocación de serviciu a la comunidá, a la sociedá.
         Con unos Ciclos Formativos, nos que los alumnos algamáis una alta cualificación p’acceder al mundu llaboral. Talleres, clases teóriques…que tan bien dirixíes a les diverses salíes profesionales qu’ufierta’l seutor de la Imaxe Personal. Con profesores que constantemente actualicen los sos conocimientos güeyando con procuru les demandes del mercáu.
        
         Agora mesmo lo único que queréis ye perdemos de vista por pesaos y cafiantes, pero col tiempu puedo aseguravos que vais recordar, con munchu ciñu, a eses persones qu’intentaron abrivos los güeyos a la cultura.

         A esi profesor que vos dio a conocer el mundu atraviés de la xeografía y la hestoria. Al que fomentó en vosotros el gustu poles artes plástiques, la música, la lliteratura, les llingües…Al que vos enseñó a pensar y tomar decisiones. A los que vos esplicaron, ensin dar un respiru, les matemátiques, la física, la bioloxía…la cosmetoloxía, la estética hidrotermal, el que vos enseñó l’alquimia del color, les téuniques de cambiu d’imaxe, que vos acercó a la realidá del trabayu nos talleres, al mundu llaboral, l’alministración d’empreses o l’anatomía y fixoloxía… y toes eses materies que creyíeis inútiles y onde facíeis esa pregunta tan conocida… ¿pero ésto que ye? ¿ a mi pa que me val?
         Col pasar del tiempu vais comprender qu’en tou momentu dieron lo meyor de sigo mesmos pa vosotros.
         Y vais pensar:
         ¡Cuánto me quixeron enseñar y qué poco los escuché yo!

         Vais alcordavos d’esos sofridos profesores que diben tres vuestro recordándovos que teníeis que presentavos a un esame de pendientes, a una recuperación o facer una práutica. N’otres ocasiones poníense serios cuando faltabeis a clase y dicíais que tabeis malos, que nun sonare’l despertador, cuando nun trayíeis los deberes fechos o vos facíeis invisible nos talleres.

         Munches vegaes daisnos esplicaciones de porqué nun facéis les coses que superen les meyores obres de ficción. Maxín nun vos falta. Y mirámosvos…y nun vos dais cuenta de que como diz el refrán “el que foi cocineru enantes que flaire, lo que pasa na cocina bien lo sabe”. Tovía tenéis dientro la inocencia de la neñez y eso ye bono, nun la perdais enxamás.

         Pero agora tócavos lo más difícil, madurecer, enfrentavos al mundu del trabayu y del estudiu solos. Pue que lo veáis como una lliberación, pero vais echalos de menos.

         Poro, nel día de güei, habéis tener un recuerdu especial pa tolos profesores que, con muncha pacencia, vos guiaron nel estudiu estos años.

         A lo meyor dalgunos de los que tais equí sois los primeros Bachilleres, Téunicos de Grau Mediu o Superior y, nel futuru, universitarios de les vueses families. Pa los güelos y los pás ye un arguyu vevos equí.
         Quiciabes ellos nun tuvieron les posiblilidaes d’estudiar que tenéis vosotros, aprovecháiles.
         Nunca nun olvidéis el vuesu orixe, a la familia que trabayó y trabaya por vosotros.
         Tolos pás y les mas quieren que los sos fíos tengan más oportunidaes de les qu’ellos tuvieron y, el camín p'alcanzales, ta nel estudiu, nel esfuerciu y nel trabayu. De xuru qu’aspiren a que tengáis lo meyor, siguíi los sos conseyos porque la vida y el trabayu ficiéronlos sabios.

         Nesti cursu, el mio mayor empeñu foi que conociereis atraviés de la Llingua y la Lliteratura asturiana la nuesa cultura, pa que podáis tresmitila a les xeneraciones venideres, pa que seyáis tolerantes cola de los demás.
         Si despreciáis lo propio, nun podréis apreciar y valorar esti mundu multicultural que vos toca vivir.
Yá sé, que dellos venís d’otres tierres, lo mesmo ficimos y facemos los nacíos n’Asturies, dir ellí onde queremos llabramos un futuru.
Pero ye qu’asturianos nun sólo somos los que nacimos equí, asturianos somos toos aquellos que queremos selo.

Agora voi ponevos un exemplu, de fondes raíces asturianes, pa qu’entendáis lo que yo deseyo pa vosotros.

Hai una pallabra qu’emplegamos muncho n’asturianu y que ye guah.e .
Guah.e forma parte del léxicu, del vocabulariu de la minería .Un guah.e yera un neñu de curtia edá qu’entraba a trabayar na mina. Nun podía dir a escuela. Col tiempu la pallabra guah.e emplegóse pa nomar a los mineros de menor categoría llaboral. Tamién taben los picadores, los mulistes, los vixilantes, nel esterior los ferreros…Dende guah.es diben ascediendo con munchu esfuerciu.
Vosotros tenéis nes vueses manes les ferramientes necesaries p’algamar la categoría llaboral que queráis.
Estudiái lo que vos guste, ciclos, carreres universitaries … y los que ya sois Téunicos de Grau Mediu, estudiái’l Superior, y los que tenéis el Superior pensái nos estudios universitarios, en facer otru Ciclu…Siguíi estudiando toos, el conocimientu nunca nun s’agota.
Atraviés del trabayu y del estudiu dexaréis de ser guah.es.
Nun vos voi dicir que vais alcontrar rápido un trabayu maraviyosu. Seréis becarios, tendréis contratos basura, trabayaréis n’oficios que nun vos gusten…, pero algún día llograréislo. L’esfuerciu siempre paga la pena.
Y cuando lo llogréis, nun ser soberbiosos, nun despreciar a naide, nun faigáis de menos a los que nun tuvieron la mesma suerte y facilidaes que vosotros. Nunca nun midáis a les persones polos sos estudios, les sos perres o los sos trabayos, toos son necesarios y dignos.
Respetái a les persones por cómo son, nun polo que son.

Vosotros sois el nuesu futuru, el futuru d’Asturies, por eso y pa finar quiero lleevos un poema d’un autor que por nacencia pertenez a la Xeneración Lliteraria de Posguerra pero que pola so temática reivindicativa de la Llingua  y Cultura Asturiana podemos encuadralu na Xeneración del Surdimientu, José Benito Álvarez-Buylla qu’escribió la:

Lletra de la Xuventú d’Asturies
        
        

Yá ta tapeciendo, Asturies,
Pol mio corazón adientro,
Fáenme yá sombra les penes,
Y nun t’alcuentro.

Quixe ser como tú yes:
Foces, picos, mar y vientu.

Fueya, yerba na campera,
Pino y carbayu en Somiéu,
Mazaricu na Gaviera,
Palomba nel Escampleru;

Sentíme migaya en Peñes,
Sentíme n’Uviéu enteru,
Nada na Foz de Moñacos
Y tou en Torrecerreo,
Fundíme como tos foces,
Alzame como l’Urriellu:

Ser pequeñu cola humilde,
Grandón col altaneru,
Apacible col benditu,
Col babayu pendencieru,
Xenerosu col amigu,
Col tiranu, gerreru,

Quixe ser como tú yes:
Borrina, llume y formientu.

Pero agora sólo pueo
Desvivime nel recuerdu:
Ver cómo reblinca’l Cares,
Amoriar baxu un lloréu,
Oyer esquiles en Ponga,
dexame morrer en Viegu.

Quixe ser como tú yes:
Borrina, llume y formientu

 

Y agora, que toa t’empines
Llamando a conceyu abiertu,
Agora, Asturies del suañu,
Nin t’alcuentro nin m’alcuentro.

 

Por eso vengo dicivos
Coles vidayes ferviendo;
¡Díi buscala vosotros!
Que yo yá nun tengo tiempu:
¡Díi alcontrala vosotros!
Que yo téngola yá dientru.
¡Díi facela!
Y facéivos
Como Asturies,
Llibertá
Borrina, llume y formientu.

 

Vosotros sois la Xuventú d’Asturies que los vuesos suaños se faigan realidá.

Munches gracies.

 

 

 

 

 

 

 

 

 

 

 

 

 

©2006 LLOBU MASTER